Chateaubriant Actualités

Kày s’ét-i la charitë ?

Ma mér é yell né en 6 Jenwvyë, Pour mé grenw-paran sa të lë përmyë dë lou kënyaw, é sa étë ousi lë dernyë. Lë grenw-pér, é surtou la grenw-mér, në sonjé yeu k’à bouhalë1 ; sa étë la kawz k’i n’on pwen yu l’tan dë fér d’awt kënyaw. L’obligâsyon dé dëvwér konjugaw, k’ô jou d’eenë on trouv normal, é ben hétenw par dsu l’marchë, sa n’të pwen een priyoritë, leegn dë là, vla twé jénérâsyon.
 
Mé  pour lë grenw-pér, Ghus dë son prénon, avày en përmyë  kënyaw sa të kenwt meem khëk chouz. Il alli dërenw à  pyë à Ghémnë é i ramni en berr aan ouzyë, é an pu een dëmi bézëy ! Mé i falli s’rand à l’évidenws : la mér n’avë pwen d’lê, ou ben een myett kenwt meem, mé pâ d’kày anpozë l’kënyaw dë brér é d’avày fen. Ghus, mon grenw-pér, konpri li tou d’swit kë senw lê sa fïy allë mourir dë fen…
 
Ernestinn, la vàyzeen, avë yu, yell ousi, een fïy ô mwé  d’Novanb d’avenw, ki yell, ren k’à la vér, n’andurë pâ la fen, leegn dë là. Een idëy vni à l’ëspri du pér Ghus. I traversi la rout du Bott, Ujeen ki të masson ërvënë li d’sa journëy. Ujeen, lë boonoom à Ernestinn, sa të la kreem déz oom. An bézenw een bolëy ô khu dla bârik Ghus li kawzi dë sa kày lë trakassë.
 
- Si Ernestinn vëlë ben, senw k’sa fass torr à son kënyaw, doonë een myett dë son lê, à mon syeen à mày, vu k’sa mér Lusi n’a pwen assë d’lê pour nourrir soon aluchon. Ghus an brëzë à màytyë an khémenwdenw sla, mé i savë ousi kë sa të la dërnyér chenws pour sa  fïy.
Ujeen hàyji li sa tét : « Si ma foom veu ben, sa dëvrë s’arrenwjë ».

Mé fallë  khémenwdë à Ernestinn. Pour mon grenw-pér Ghus, khémenwdë een chouz parày sa të presk een përyér. Ernestinn pri d’kour su l’mooman në réfléchi meem pâ « Jë ben du lè pour deu, jë nourirë ta ptit fïy, péskë Lusi yell n’aan a pâ assë ».

Nout Kurë  nou répett senwz arrê k’i faw fér la charitë, I sonj vantyé à la khett du dimenwch. Mé mày jë sonj k’i vaw myeu doonë dë sày-meem, é rand serviss à son përchen. Sa vaw ousi ben kë d’doonë en fâyi sou à la khett à la grenw-més.
 
E sé  koom sa kë ma mér a survékhu, é par la meem, a éritë  d’een sër dë lê. Êz on vékhu tout lou vïy kout-à-kout, à partàyjë lou sëkrê é pi lé traka dë l’een ou ben dë l’awt…

Ujeen COGREL


Lë  Bâtarr
 
Alfons avë 40 enw é ërvënë dla ghér, sa të l’mwé d’Avri ! À La gâr dë Rdon, k’i të been éz dë rwér, i trouvi là, su l’khê, en wâzê ki koonésë, en vàyzen d’ché lu, ki të là pour ben d’awt chouz kë d’rankontrë en prizoonyë libérë ki rantrë ché lu !Alfons të là tou sël, à khenz khiloomett dë sa mézon, dë sa foom, é d’sé kënyaw ki avé ben du grenwdi dëpëy siz enw !

Lë  vàyzen në pouvë k’ël chëràyë à ërvëni à sa ferm. Denw la chârt î kawzit ben sur, é à en mooman lë vàyzen li dizi :

- Të vla  ërvënu é à peu prëy an  boon senwtë à s’kë j’vày, tenw myeu, mé siz enw s’é lon, vantyé ben k’ché tày tu vâ trouvë du  chenwjman ?
- Kày don ? s’étooni Alfons
- Tu vèrâ ben ! li répondi l’vàyzen.
 
La diskusyon s’aretti là, é î s’son mi à préchë dé chouz d’avenw la ghér. S’ërmett tou  an mémwér, aprëy  siz enw parti, sa fê du byen  mawgër tou. Pu la chârt avenwsë, é pu lé souvni ërvëné, siz enw pâsë si leegn dë ché sày, sa n’é kenwt meem pâ ren ! Lë chfa s’arretti dvenw dé batiman, sa të lé syen dla ferm à Alfons, ren në sanbyë avày chenwjë :

- Të vla arrivë Alfons, jë së been éz dë  t’avày randu servis ; à en d’sé jou, on bàyra een bollëy !
 
Twé  kënyaw arrivit an  kourenw, pour ërgardë sët  enkoonu, kë lou mér avë di d’li: s’é vout pér ki të prizoonyë, é ki ërvyen à la mézon ! E een bell  foom breen  arrivi yell ousi an kourenw, é ê së jti ô kou dë l’arrivenw.  Alfons avë ërtrouvë sa Nadett, il la séri denw sé bra é yell  s’é lésëy fér sou léz bijri. E pi tou deu, bra dsu, bra dsou, î son  rantrë denw la mézon.
 
Mé  là, ô mitenw dla pyas n’y’avë een awt kënyay, ki s’ésëyë à marchë, lé chfeu à màytyë  roukhen, pâ  een myett  koom lé syen à Nadett :

- Vé Alfons, î s’aan é pâsë dé chouz kenw tu n’été pâ là ! En sày, î son vnu à puzyeur. J’n’an së pâ mort, mé î m’on lésë en souvni.

Lë  pti  kënyaw n’an të pâ la kawz. Alfons sonji : « Oon n’tu pu lé bâtarr dëmézë ! Pésk il é là, i fawdra ben l’gardë. Pour lë rëst, vu s’ki s’të pâsë, n’y’avë ti khëk chouz à pardoonë, vantyé ? é korr ? »
 
Léz  enwnëy  on pâsë, Alfons é sa Nadett on vékhu  eureu, Lë pti dernyë, lë bâtarr Alfons, liz a doonë son non. Mawgër sëla,  Rodolf paskë sa mér Nadett l’avë noomë d’meem, fu trétë dë batarr, dë boch, dë fi d’puten, é korr dë ben d’awt chouz. Mé il a grenwdi koom léz awt , i fu l’sël à rëstë pëyizenw, léz awt frér partit yeu é grenwdz  ëkol , ben leegn dë lou  paran.

Nadett  tonbi malad, la mawvéz  maladi koom on dizë d’awtfày, é korr astour. Mawgër lé swen sa allë dë puz an pu mall. Alfons konpërni  kë sa Nadett allë l’khitë, é tou sël i brëzë. En  maten koom tou lé jou, Alfons  khémenwdë à sa foom si ê vlë khëkchouz ki pourë li fér pyézi, sa të la meem répons : nouna ! E pi en maten Nadett li di :

- J’veu préchë à Rodolf,  j’veu ki  pran  swen  d’tày kenw jë n’srë pu là. Jë veu li préchë, é j’veu ét tout sël avèk li.

Alfons ërparti an brëzenw.
 
Lë  dernyë garr à Nadett së syéti à koutë  du li d’sa mér :

-Tu vày mon fi, j’ë toultan di kë j’avé étë prenz dë fors, é s’é pour sa kë tu é né, La véritë s’é kë j’ë étë  amoureuz d’en baw gâ ; een Alman ben sur. I vnë la nëtëy chét, é sa duri ben si mwé, Aprëy sa il é ërparti pour la Normandi ëyou  k’i s’é fê tùë ! Tu konpran, j’té tout sël, é korr jeen, j’avé bëzwen d’amour, ou tou senplëman dé kâress d’een oom.
 
En sày, é sa s’é vrày il é vnu avèk dé kopen, y’aan avë pyen la mézon, mé së sày-là persoon në m’a touchëy. Tu vày mon fi, Rodolf sa të lë non dë ton pér, tu n’é pâ en kënyaw dë la vyolenws, mé ben lë rézulta d’een  amour partàyjë, pâsàyjë vantyé, mé ben réell. Jë vlé kë tu së tou sla, avenw kë j’m’an vâ. An pu jë të khémenwd dë tout mé dërnyér fors dë prand swen dë l’oom ki t’a doonë son non é ki t’a élvë koom yen dé syen.

Antërtan  Rodolf avë trouvë een bell breenett, i s’të maryë, é dé kënyaw té yeu né, la vi kontinwë. Tout lé smeen i randë vizit à son pér adoptif, pour li prand dë së nouvell é liz an doonë an rtour......
 
Tou sa avë amnë Alfons à dir à yen d’sé keemarad  pansyoonerr ki li fëzë ërmarkë kë son garr në l’oubliyë jeemëy, leegn dë là :

- Tu vày, së kënyaw-là, jë lë trouvë tou pti kenw jë së ërvënu dla  ghér, dë sa nésenws j’n’an së pour ren ! N’anpéch,  kë jë sonj,  kë pour mày sa étë lë mëyour dë mé garsây.

Ujeen Cogrel
 
D’après une idée originale d’Albert Poulain de Pipriac